KORONADAL CITY – Naglab-ot sa tatlo ang napilasan sa pagkabunggo sang isa ka SUV sa concrete barrier sa bahin sang national higway, atubang sang Agreda Rice mill sa Barangay Zone 2, Koronadal City pasado alas-10 kagab-i kadungan sang closing activities sang Silver Tnalak festival kag 58th foundation anniversary.
Ginkilala ang driver nga si Rosalinda Cuaresma, 49-anyos, may bana kag residente sang Barangay GPS, Koronadal City kag ang kaupod sini nga mga menor de edad nga nagapang-idaron lamang sang 14-anyos kag 12-anyos.
Naguwa sa imbestigasyon sang traffic section sang Koronadal City PNP, padulong sa banwa sang Tupi ang salakyan nga Mitsubishi Montero nga puti sang maaksidente sa nasambit nga lugar.
Gilayon man nga naresondehan ang mga biktima kag nadala sa hospital.
Nahibaluan nga lunsay mga minor injuries lang ang naangkon sang mga ini.
Nagapadayon naman ang pahanumdom sang mga otoridad sa mga nagamaneho nga maghalong agud mangin malayo sa disgrasya.
