KORONADAL CITY – Ginatutukan subong sang mga otoridad ang 3 ka barangay sa siyudad sang Koronadal nga ginpaidalom sa hotspot areas subong nga election period bangud sa presensiya sang mga armado nga grupo.
Ini ang ginkumpirmar ni City Comelec Election Assistant 2 Cholly Loritcha sa interbyu sang Bombo Radyo Koronadal.
Ang mga barangay nga ini ang ginalakipan sang Barangay San Jose, Cacub kag Topland.
Suno kay Loritcha, yara sa orange category ang nasambit nga mga barangay bangud sa namonitor nga presensiya sang mga armado nga grupo.
Nahibaluan nga kalakip ang nasambit nga mga barangay sa halos 8 mil ka mga lugar sa bug-os nga pungsod nga ginpaidalom sa hotspot areas subong nga election period.
Sa subong, ginpahugtan pa ang monitoring sang kapulisan kag mga suldado sa nasambit nga mga barangay sa posible nga kalakasan nga matabo sa palaabuton nga eleksiyon tuga sang mga armado nga grupo ukon rebelde nga NPA.
