KORONADAL CITY – Ginalauman nga igapaguwa subong nga adlaw sang Lunes ang damage assessment report sang Municipal Disaster Risk Reduction and Management Office (MDRRMO) sa banwa sang Palimbang, Sultan Kudarat makaligad nagpanalasa ang buhawi.
Sa interbyu sang Bombo Radyo Koronadal kay Palimbang Mayor Joenemi Kapina, apektado ang tatlo ka barangay sang nasambit nga kalamidad nga ginalakipan sang Barangay Milbuk, Libua kag San Roque.
Ginguba naman sang mabaskog nga hangin ang duha ka kabalayan kag isa ka buluthoan nga natumbahan sang puno sa nasambit nga mga barangay.
Suno kay Mayor Kapina, gilayon sila nga nagpatigayon sang clearing operations sang nagligad ang kalamidad kun sa diin nakabalik na sa ila mga panimalay ang yara sa 10 apektado nga pamilya.
Ginapahalong man sini ang iya mga kasimanwa sa damyos nga tuga sang palaabuton nga mga bagyo nga ginalauman nga may epekto sa ila lugar kag magadala sang mabaskog nga ulan kag hangin.
