KORONADAL CITY – Arestado ang 2 ka mga barangay official kag isa ka bata sang Kapitan sa ginpatigayon nga drug operation sang mga otoridad sa pagpanguna sang Police Regional Office 12.
Sa interbyu sang Bombo Radyo Koronadal kay PSupt. Maximo Sebastian, Police Regional Office (PRO) 12, magluwas sa nagkaladakpan, may nakapalagyo pa nga isa ka target person nga isa sa gihapon nga barangay chairman sa ginpatigayon nga magkatuhay nga raid sa mga barangay nga sakop sang Sultan Kudarat.
Ginkilala ni Sebastian ang mga natikma nga suspek nga sanday barangay Captain Ali Ebus Bigkug, 49-anyos kag residente sang Brgy. Zenebin, nakuha sa ila nga posisyon ang 5 ka sachet sang ginapatihan nga shabu kag ang bata sini nga si Mohiden Akan Bigkog, yara sa legal nga edad kun sa diin nakuha man sa posisyon sini ang 1 cal. 99 nga armas luthang kag 1 ka unit sang cal. 45 pistol kag isa pa ka Barangay Kagawad nga si Mohammad Tazir Tasil, 36-anyos, kag residente sang Brgy. Timbalayan kun sa diin narekober sa iya ang 1 .cal 45 Taurus nga armas.
Samtang, padayon pa nga ginapangita sa subong ang isa ka Barangay Kapitan nga si Butch Magelen Mangango, 48-anyos, kag kasamtangan nga kapitan sang Barangay Sadsalan sang nasambit nga banwa matapos nga makapalagyo apang nakuha sa panimalay sini ang ang 4 rounds nga live ammunition sang 9mm nga armas.
Sa subong yara na sa kostudiya sang Lambayong Municipal police station ang nagkaladakpan nga mga suspek samtang ginapreparar ang kaso nga isang-at batuk sa ila.
