KORONADAL CITY – Nagnubo ang gun related violence sa probinsya sang Sultan Kudarat bangud sa asud-asod nga pagsungka sang mga iligal nga armas sang mga residente sang nasambit nga probinsya.
Nahibulaan nga subong nga hapon lang 29 ka mga high powered firearms ang ginsungk sang mga residente sa 5th Marine Battallion Landing TEAM (MBLT-5) sa pagpamuno ni Lt. Col Francis Julius Buyucan sa banwa sang Palimbang, Sultan Kudarat.
Sa interbyu sang Bombo Radyo Koronadal kay Sultan Kudarat Police Provincial Director Senior Superintendent Raul Supiter ang mga armas ang naghalin sa 5 ka mga barangay nga ginakabug-usan sang Barangay Libua, Butril, Malatunol, Kidayan, Namat, Kisek, Akol, Kanipaan kag Kiponget.
Ang mga armas nga ginsungka ang ginakabug-usan sang 3 M16 rifles; 5 M14 rifles; 3 Garand rifles; 1 homemade M79 Grenade Lancer; 1 unit uzi; 2 M203 grenade lancer ; 12 homemade shotgun; 1 cal. 38 kag 1 Thompson.
Dugang pa ni Col. Supiter nga ang pagsungka sang mga armas ang dako nga bulig agud matapna ang padayon nga recruitment sang ISIS patronizing local terrorist groups.
Sa karun ang nasambit nga mga armas ang yara kustodiya na sang Sultan Kudarat Police Provincial Office para sa tama nga disposisyon.
