Nakabalik na sa Pilipinas ang lima sa 27 ka Filipino seafarers nga sakay sa barko nga MV Transworld Navigator nga gin-atake sang Houthi rebels sa Red Sea.
Ini nga batch halin sa nasambit nga Liberian-flagged kag Greek-owned cargo ship ang ginpapauli paagi sa Emirates flight nga nag-abot sa Ninoy Aquino International Airport Terminal 3 kahapon sang hapon, Hunyo 30.
Sila ang gin-abi-abi sang Department of Migrant Workers (DMW) kag sang Overseas Workers Welfare Administration (OWWA).
Suno sa DMW, pila ka atake ang ginhimo sang Houthis apang nakapadayon sa paglayag ang barko tubtub nga nakalab-ot sa Egypt.
Safe ang tanan nga mga Pinoy apang naga-eksperyensya lang sang emotional stress bangud sa ginhimo ang rebelde nga naka-base sa Yemen. Apang suno sa DMW, magahatag sila sang financial kag psychological assistance.
Ang iban sa ila nga kaupdanan ang nakatalana man nga mag-abot buwas kag sa Hulyo 3.
Ang MV Transworld Navigator amo na ang ikaapat nga barko nga may sakay nga Filipino crew nga gin-atake sang Houthi rebels halin sang Nobyembre sang nagligad nga tuig.
