KORONADAL CITY – Ginbawian sang kabuhi ang isa ka 23-anyos nga lalaki makaligad nga madisgrasya bangud sa pagpartisipar sa Drag Racing sa bahin sang National highway, Purok Maligaya, Barangay Carpenter Hill,Koronadal City.
Ginkilala ni PSMSgt Fely Bascon sang Koronadal City PNP Traffic Section ang biktima nga si “Ronel” 23-anyos , soltero kag residente sang nasambit nga lugar.
Sa interview sang Bombo Radyo kay Bascon, ginpahayag sini nga naguwa sa ila imbestigasyon nga nagapakig-karera suno pa ang biktima kag 3 pa ka mga kaupdanan sini sang nagluntad ang aksidente.
Suno kay Bascon, samtang nagakarera ang biktima kag kaupdanan sini sa lugar hinali nga nagliko ang isa ka pick-up kabangdanan nga nabunggo-an ini sang biktima.
Bangud sa kabaskog sang impact sang pagkabunggo, nagupi ang parte sang pick up samtang wasak naman sang ginasakyan ni “Ronel” nga motorsiklo kag nagtabog pa ini sang pila ka metros halin sa “point of collision”.
Nag-angkon sang malala nga pilas kag bali ang ang biktima nga tuga sag mabaskog nga impact sang disgrasya.
Gindala pa ini sa hospital apang gindeklarar na nga dead-on-arrival sang doktor.
Kaangot sini, liwat nga nagapanawagan ang Koronadal City PNP Traffic Section nga likawan ang Drag racing sa kalabaon sang National Highway bangud peligroso ini sa mga motorista kag mangin tunaan sang kamatayon.
