KORONADAL CITY-Pormal na nga ginpasakaan sang kaso ang 22 katao kalakip na ang isa ka kapitan nga ginatudlo nga responsable sa pag-pang-ambush sa bahin sang Guindulungan, Maguindanao sang naglabay nga Sabado nga ginkapatay sang 10 ka tao.
Ini ang ginhatagan sang ligwa ni Guindulungan PNP station chief Lt. Anwar Mabata makaligad nga makuhaan sang pahayag kag positibo nga gin tudlo ang 22 ka suspek sang mga witness nga survivor sa nasambit nga krimen.
Kaso nga multiple murder kag frustrated multiple murder ang ginpasaka batok sa mga suspek nga mga malapit man nga paryente sang mga biktima. Kalakip sa ginkasuhan ang si Barangay Kapitan Tamano Mamalapat ng Barangay Kitapok, Datu Saudi Ampatuan nga isa man ka vice mayoralty candidate sang nasambit nga banwa.
Ginpanginwala naman ni Mamalapat ang alegasyon batok sa iya kag nagpahayag nga wala siya sang kahilabtanan sa nasambit nga pagpang-ambush. Ang mga witness nga nakuhaan sang pahayag ang kalakip sa ika-3 nga salakyan nga convoy ni Peges Mamasainged alias Commander Black Magic ng MILF,kag mga kabataan sini apang nakapalagyo kabangdanan nga wala sila mapatay.
Ginpahayag sang PNP nga ang ugat sang rido nanday Commander Black Magic kag Commander Jordan amu ang pagkapatay sang misis ni Commander Jordan kun sa diin isa sa mga ginatudlo nga suspek ang isa sa mga bata ni Commander Black Magic.
