KORONADAL CITY – Malipayon nga ginbalita ni OPPAP Secretary Jess Dureza ang pagpadulong subong nga adlaw sang panibag-o nga batch sang mga rebel returnees sa Malakanyang agud nga makigkita kay Pangulong Rodrigo Duterte.
Sa eksklusibo nga interbyu sang Bombo Radyo Koronadal kay Secretary Dureza, ginpahayag sini nga yara sa 200 ka mga rebel returnees ang makaupod sa panyapon ni Pangulong Duterte.
Suno kay Dureza, kabahin sa gihapon sang programa sang gobyerno nga mahatagan sang tsansa ang anay mga katapu sang New Peoples Army nga makaistorya ang pangulo agud mapalab-ot ang ila nga hibubun-ot.
Ini sa pihak sang padayon nga kanselasyon sang peace negotiation sa tunga sang gobyerno kag CPP-NPA-NDF.
Tubtob nga indi magpakita sang sensiridad ang NPA, indi mahimo nga makabalik sa pakignegosasyon ang gobyerno.
Sa subong, nakatutok ang gobyerno sa paghatag sang bulig sa mga nagabalik sa sabak sang gobyerno halin sa kabukiran.
Nahibaluan nga yara na sa 800 ang mga nagsungka nga rebelde ang naistorya sang personal ni Pangulong Duterte sa Malakanyang.
