KORONADAL CITY – Ginaistoryahan sa subong sa South Cotabato ang pagkatukib sang mga dokumento sa pagpangbiktima ni Wilma Mamburam sa duha ka tribal clan angot sa P8.7B Road Right of Way scam.
Ini makaligad nga gin-ako sa Bombo Radyo Koronadal ni Lake Sebu Mayor Antonio Fungan nga gingamit ni Mamburam ang kahuyang sang duha ka tribo agud nga mahatagan siya sang Special Power of Attorney (SPA) nga mangin authorized representative sa Road Right of Way claims sang mga ini sa ginauyatan nga Certificate of Ancestral Domain Title.
Suno kay Fungan antes pa man nabuyagyag ang scam sa Road Right of Way, nakaangkon sang faction ang Tribo Ubo kag Tboli sa banwa sang Lake Sebu kun diin ang mga IP leaders sang nasambit nga mga grupo ang gin-istorya ni Mamburam kag gin-awhag paagi sa paghatag sang pasiuna nga bayad sa mga tribo paagi sa bugas agud nga makuha ang pagsalig sang mga ini.
Nagpromisa man si Mamburam nga padalion ang proseso sang claims kabaylo sang 70-30 share kun diin mas dako ang magapadulong sa iya.
Nagpirma man sa isa ka resolusyon si Mayor Fungan kaupod ang Sangguniang Bayan sang Lake Sebu sa tinutuyo nga mag-isa na lamang ang duha ka tribo agud nga mas madasig ang pagproseso sang claim.
Nagpasalamat man si Fungan nga nabuyagyag ang ginahimo ni Mamburam kag ang koneksiyon sini sa mga opisyal sang gobyerbo kasubong sang DPWH, Registry of Deeds kag iban pa bangud sa tion nga marelease na ang claim, magapadulong tanan sa mga IP kag indi magpadulong sa mga manugtunto.
Kaangot sini, nagalaum naman ang alkalde nga mapahamtangan sang penalidad ang mga involbado sa Road Right of Way scam sa liwat nga pagpatigayon sang Senate Hearing.
