Patay ang duha ka mga terorista sa magkalain-lain nga operasyon sang militar sa mga probinsya sang Maguindanao del Norte kag Sultan Kudarat.
Suno kay Brigadier General Romulo Quemado II, Commander sang 1st Marine Brigade, napatay si Norsaidie Samo Tato, isa ka miyembro sang Tato Group isa ka kilala nga armadong grupo nga may kalabutan sa mga kriminal nga aktibidad sa lugar sa engkwentro nga natabo sang alas-5:00 sang aga sang Abril 18, 2025 sa Barangay Meti, Datu Blah Sinsuat, Maguindanao del Norte.
Ginsuguran ang operasyon sang mga tropa sang Marine Battalion Landing Tea- 5 (MBLT5) upod ang kapulisan kag iban pa nga security agencies.
Nakuha sa lugar sang engkwentro ang nagkalain-lain nga klase sang armas kag kagamitan, upod na ang isa ka shotgun, isa ka Springfield Armory caliber .45 pistol, isa ka caliber .22 pistol nga may scope, mga magasin kag bala, isa ka granada, lima ka handheld radios, kag duha ka passport kag duha ka identification cards.
Samtang, pasado alas-5:00 sang hapon sa amo man nga adlaw, may isa pa ka engkwentro nga natabo sa Purok Patyog, Barangay Banali, Senator Ninoy Aquino, Sultan Kudarat.
Isa ka miyembro sang communist terrorist group ang napatay matapos nga nagsugata sila sang tropa sang 7th Infantry (Tapat) Battalion nga ginapangunahan ni Lt. Col. Tristan Rey P. Vallescas.
Suno sa report, may mga residente nga nagsugid sa presensya sang armado nga grupo nga nagapangikil sa mga mangunguma, negosyante, kag maski sa mga kandidato sa pulitika.
Gilayon nga nagresponde ang mga tropa sang 7IB nga nagtuga sang engkwentro kag pagkapatay sang isa ka miyembro sang CTG kag pagkabawi sang isa ka M16 rifle.
Ginpahayag ni Brigadier General Michael A. Santos, Commander sang 603rd Infantry Brigade, nga padayon nga alerto ang militar bisan pa sa pagselebrar sang mga banal nga aktibidad sa Semana Santa.
Samtang, ginhatagan man sang pagkilala kag pagpasidungog ni Major General Donald M. Gumiran, Commander sang 6th Infantry (Kampilan) Division kag sang Joint Task Force Central (JTFC), ang mga tropa sa ila malampuson nga operasyon.
