KORONADAL CITY- Natumod na sang Bombo Radyo Koronadal ang identity sang mga pilason sa nagluntad nga pagsigabong sang bomba sa Christ the King Cathedral Brgy. Zone 3 Koronadal City.
Ginkilala ang mga ini kanday Dindo Zamora, 39 anyos residente sang Prk. Siodina Brgy. GPS Koronadal City, Henerosa Sumargo, 44 anyos nga residente sang Prk. Malipayon Brgy. Topland Koronadal City samtang natrauma naman si Gng. Helen Payunan, isa ka manunudlo, 48 anyos, residente sang Brgy. Zone I Koronadal City.
Sa ekslusibo nga interbyu sang Bombo kay Gng. Helen Payunan, nakasay sila sa traysikel gikan sa isa ka mall padulong sa simbahan agud magtambong sa bunyag sang yara na sila sa guwa sang simbahan, hinali na lamang nga may naglupok kun diin naigo ang traysikel driver nga si Zamora.
Gilayon naman nga naglumpat sa traysikel si Gng Helen bangud sa lubos nga kakulba sa nakita nga aso sa palibot.
Sang matabo ang pagsigabong, may mga tawo man nga nagpanic sa palibot labi na sa mga flower vendors kun diin pasado alas 12 sang udto sang nagluntad nag pagsigabong.
Naghilibion naman si Gng. Helen bangud lubos nga kahadlok ang iya nabatyagan pati ang 2 ka iban pa kag nagapasalamat sa Diyos nga buhi pa siya kun diin ginakabig sini nga ikaduha nga kabuhi ang pagkaluwas sa natabo nga pagsigabong.
