KORONADAL CITY – Nagapadayon sa subong ang imbestigasyon sang kapulisan sa nagluntad nga pagpangluthang sang mga armado sa Brgy. Salimbao, Sultan Kudarat, Maguindanao nga nagresulta sa pagkapilas sang duha katawo.
Ginkilala sang Sultan Kudarat PNP ang mga pilason nga biktima nga sanday William Fresnillo kag Tahir Doton, lunsay yara sa legal nga edad kag residente sang nasambit nga lugar.
Sandig sa report, samtang nagaparking lamang kuntani sang motorsiklo sa atubangan sang ila nga puluy-an si Fresnillo sang ginpalapitan sang duha ka armado nga suspek kag ginluthang.
Samtang, naigo naman sang bala ang kaingod sini nga si Doton.
Nag-angkon sang igo sang bala sa nagkalain-lain nga bahin sang ila lawas ang mga biktima nga gilayon gindala sa hospital.
Sa subong, indi pa matumod sang mga otoridad ang motibo sang mga suspek sa nagluntad nga pagpangluthang.
