May duha na ka persons of interest ang mga katapo ang Makilala Municipal Police Station kaangot sa brutal nga pagpatay sa isa ka 18-anyos nga si Rhona Mae Patricio nga posible nga ginhimuslan antes nga ginpatay sa bahin sang Barangay Old Bulatukan sang Miyerkules, Hunyo 11, 2025.
Ini ang nangin pahayag ni PCMS Ritchie Gesulga, information officer sang Makilala Municipal Police Station sa interview sang Bombo Radyo Koronadal.
Naguwa sa imbetigasyon sang Makilala Municipal Police Station nga naguwa banda alas 7:30 sang gab-e sang Martes, Hunyo 10, ang biktima agud nga magpangita sng cellphone signal apang wala na ini makauli.
Dugang pa sini, nasapwan na lamang ang lawas sang biktima nga wala na sang kabuhi sa bahin sang creek malapit sa ila nga panimalay sa diin wala na ini sang panapton sa ibabaw kag idalom nga bahin sang lawas kag may ara man sang madalom nga pilas sa ulo nga nangin tunaan sang kamatayon sini.
Apisar nga ginahulat pa sang otoridad ang resulta sang postmortem examination, may posibiliddad suno pa nga ginhimuslan anay ang dalaga antes nga ginpatay
Ginkumpirmar man sang mga kapulisan nga may duha ka mga indibidwal ang ginakabig sa subong nga persons of interest sa krimen samtang padayon pa ang imbestigasyon sang mga otoridad sa ulihi nga nakatext ukon naka-chat sang biktima antes ini nga ginpata.
Hugot naman nga ginkondenar sang pamilya kag mga nakakilala sa biktima nga makangilidlis nga krimen kag nagapanawagan sang madasig nga hustisya.
Nagapanawagan naman subong nga otoridad sa publiko nga maghatag sang impormasyon kun may ihibalo sa nasambit nga krimen agud nga madasig nga maresolbar sang Makilala Police Station ang krimen kag mapanabat ang may kahimuan sa nasambit nga pagpatay sa biktima.
