Duha ang kompirmado nga patay matapos ang nagluntad nga pagpangluthang sa campaign rally ni anay United States President Donald Trump sa Pennsylvania.
Suno sa Butler County District attorney, napatay sa amo nga insidente ang ginatudlo suspek kag ang isa ka nagtambong sa rally. Isa pa ka persona ang yara sa kritikal nga kondisyon.
Nahibaluan nga nagadul-ong sang diskurso si Trump sa ibabaw sang intablado sang hinali sini gin-uyatan ang iya dulongan kag natumba. Gilayon ini ginpalibutan sang iya security tubtob nga nakatindog kag nagsingit sang tinaga nga “fight” samtang ginabayaw ang iya mga kamumuo.
Nakita man sa video nga may dugo sa dulongan sang anay pangulo samtang ini ang nagabiya sa lugar.
Suno naman sa US Secret Service, luwas na karun sa katalagman si Trump.
Nagpalab-ot naman sang pagpangamuyo ang mga lider sang Amerika kalakip na si anay US President Barack Obama.
Sa karun naglunsyar na sang imbestigasyon ang US Secret Service agud matumod ang motibo sang suspetsado.
