KORONADAL CITY – Ginbawian sang kabuhi ang duha ka indibidwal sa nagluntad nga disgrasya sa dalanon sa natiional highway, Purok Paraiso, Brgy. Reyes sa banwa sang Banga, South Cotabato.
Ginkilala sang Banga PNP ang napatay nga driver sang motorsiklo nga si Nelson Silao, 52 anyos kag ang angkas sini nga si Jeryl Sampiroy, alyas Bolato, 37 anyos, lunsay mga residente sang Brgy.Lopez Jaena sa banwa sang Norala, South Cotabato.
Samtang, ang driver naman sang Kia Bonggo Truck ang ginkilala kay Edgar Cantalecio, 24 anyos, residente sang Brgy. Kibanggay, Lantapan, Bukidnon.
Sa imbestigasyon sang Banga PNP, ginasubay sang Bonbbo ang kalabaon sang National Highway padulong sa banwa sang Surallah agud magadeliver sang mga gulay sang gulpiyada nga naglusot ang motorsiklo nga gintunaan sang pagbungguanay sang mga ini.
Bangud sa kabaskog sang impact, nagtabog ang sakay sang motorsiklo kun diin nakaangkon ang mga ini sang malala nga pilas sa ulo kag sa iban pa nga parte sang ila lawas.
Nadala pa ang mga ini sa hospital apang gindeklarar na ang patay.
Sa karon, yara na sa kustodiya sang kapulisan ang drver sang Bonggo.
Padayon naman ang pagpahanumdom sang kapulisan sa mga motorista nga maghinay sa pagpadalagan sang salakyan kag mangin mahalong sa tanan nga tion agud makalikaw sa disgrasya sa dalanon.
