LAKE SEBU, SOUTH COTABATO– Nakapagkit na sang duha ka patay ang bayan sang Lake Sebu , South Cotabato bangud sa malapnagon nga baha tuga sang wala untat nga pagbubo sang mabaskog nga ulan.
Ini ang ginpahayag ni Lake Sebu Mayor Floro Gandam sa ekslusibo nga interbyu sang Bombo Radyo Koronadal.
Suno sa alkalde, bangud sa padayon nga pagbubo sang ulan sa ila nga lugar humalin pa sang nagligad nga adlaw, nag-awas ang tubig baha sa Sungan River sa bahin sang Brgy.Kibang,Ned ,Lake Sebu kun diin gintilawan sang 3 ka mga manunudlo nga magtabok sa suba apang gin-anod ang mga ini sang mabaskog nga tubig.
Masuwerte naman nga nakauyat ang isa sa mga biktima sa puno sang kawayan apang bangud sa mabaskog nga current sang tubig baha tigayon nga naanod ang duha ka mga kaupod sini.
Magluwas diri, napulo ka mga puluy-an man ang naanod sang baha, may duha man ka kabato kag isa ka taytay ang naguba.
Nagsaka naman sa halos 400 ka mga pamilya ang kasamtangan nga nagatinir sa duha ka mga gym, isa ka simbahan kag evacuation center nga ginakinahanglan mahatagan sang dugang nga ayuda.
Magluwas pa diri, nakapagkit man sang landslide sa Lamdalag.
Sa subong, nagapadayon ang pagpanghatag sang relief assistance sang LGU sa mga apekradi nga residente.
Ginahibalo naman sa subong ang kabug-usan nga damyos sang nasambit nga pagbaha.
