KORONADAL CITY – Nagapadayon ang imbestigasyon sang mga otoridad sa nagluntad nga sunod-sunod nga pagpangluthang-patay sa duha mga motorista nga gin-agawan pa sang motorsiklo sa banwa sang Tantangan, South Cotabato pasado ala-una kaina sang hapon, Domingo, Agosto 2,20024.
Una nga nangin biktima sang mga ini si Levimar Moderacion, 33-anyos, may asawa kag residente sang Barangay Paraiso, Koronada City.
Sa interview sang Bombo Radyo Koronadal kay Ginang Flora Labuteng, bayaw ni Levimar, halin sa Barangay New Iloilo, Tantangan ang biktima upod ang asawa sini sakay sang motorsiklo sang pag-abot nila sa Barangay Tinongcop, ginbalabagan ang mga ini sang kalalakihan nga nakamotorsiklo, gilayon nga gintiro kag gin-agaw ang raider nga motorsiklo sini.
Naghana pa nga magpalagyo ang asawa sang biktima apang ginguyod ini sang isa sa mga suspek kag ginkuha ang iya nga bag.
Maayo na lamang wala ini gintiro kasubong sang iya nga bana nga gilayon ginbawian sang kabuhi.
Dugang pa ni Ginang Labuteng, gin-impormar lamang siya sang una nga nakakita sa iya bayaw rason nga nagpangayo sila sang bulig sa mga otoridad.
Nag-agi pa ang mga suspek sa ila puluy-an sakay sang apat ka motorsiklo lakip na ang raider sang biktima.
Nagahilibion naman si Ginang Labuteng sa pagpahayag nga kuntani ginkuha lang ang motor sang bayaw sini kag wala nalang siya gintiro bangud may pamilya ini.
Samtang, wala pa nakuntento ang mga suspek, sa unahan lamang sang tinongcop may gin-agawan man sila sang Baja nga motor apang nakaluwas ang biktima matapos sini ginhatag ang motorsiklo.
Ginsundan pa gid ini sang isa pa ka pagpangluthang-patay sa biktima sa Purok Tuburan, Brgy. Maibo, Tantangan, South Cotabato.
Nakuha sang mga motornapper sa biktima ang motorsiklo sini nga XRM nga nagaduag sang yellow.
Ginkilala ini nga si Daryll Nuqui, isa ka Grade 12 student, kag residente sang Brgy. Bukay Pait, Tantangan, South Cotabato.
Sa karon, nagapadayon ang pagpangita sang kapulisan sa mga motornapper nga ginapatihan isa ka organisado nga grupo.
Nagasinggitan naman sang hustisya ang pamilya sang mga biktima.
