KORONADAL CITY – Nagapadayon ang imbestigasyon sang mga otoridad sa nagluntad nga pagpangluthang-patay sa isa ka kumander sang Moro National Liberation Front ukon MNLF kag kaupod sini sa banwa sang Midsayap, North Cotabato.
Ginkilala ang mga biktima nga sanday Datu Lumambok Mananimbong, 66, Division kumander sang MNLF sa Central Mindanao kag Bert Aran Camen.
Suno kay Police Supt. Bernard Tayong, tigpamaba sang Cotabato Police Provincial Office, ginluthang ang mga biktima sang riding in tandem suspect sa atubangan mismo sang Hall of Justice sa National Highway sa Barangay Sadaan sa banwa sang Midsayap, North Cotabato.
Gilayon naman nga nagpalagyo ang mga suspek matapos ginhimo ang krimen.
Sa subong, ginahibalo pa sang mga otoridad ang motibo sa pagpatay sa mga biktima.
