KORONADAL CITY -Nagresulta sa pagkapatay sang duha ka indibidwal lakip na ang isa ka menor de edad ang ginpatigayon nga operasyon sang kapulisan batuk sa mga wanted persons sa Sitio Ebenezer, Brgy. Rang-ay, Banga, South Cotabato.
Ginkilala ang mga napatay nga sanday Roberto Lapastora, 41 anyos kag Jemiles Dasan, 14 anyos, bata sang isa ka Sitio Kagawad nga lunsay residente sang nasambit nga lugar.
Sa eksklusibo nga interbyu sang Bombo Radyo Koronadal kay Irida Dasan, himata sang mga napatay, wala sila nagapati nga nagbato ang duha bangud wala suno pa sang armas ang mga ini.
Wala man daw sang mga kaso nga ginapangatubang sanday Lapastora kag Dasan rason nga dako ang pagpati ni Ginang Irida nga mistaken identity ang natabo sa ila mga himata nga nagauling lamang sa nasambit nga lugar.
Mangin ang nakuha nga mga armas sa mga napatay ang ginadudahan nga planted lamang suno sa pamilya.
Sa subong akig ang nagapangibabaw sa pamilya sang duha nga napatay kag nagapanawagan sang hustisya bangud nagsala lamang suno pa ang kapulisan sa ila ginhimo.
Nanindugan naman ang kapulisan nga legitimate police operation ang ginpatigayon sang mga ini.
Suno kay Police Lt. Joenary Castanares, DCOP sang Banga MPS, target sang operasyon ang duha ka most wanted persons sa ila nga banwa kag sa bug-os nga probinsiya sang South Cotabato kag ang mga suspek ang una nga nagpalupok sa operating team rason nga napilitan sila nga magbalos tubtob naglab-ot sa baslanay sang lupok nga nagresulta sa pagkamatay sang duha.
Makapamatuod suno pa ang nakuha nga armas sa mga suspek lakip na ang isa ka menor de edad nga delikado nga mga tawo ang mga ini.
Apang, nakahanda naman nga atubangon sang PNP ang anuman nga kaso ukon reklamo nga igapasaka sang pamilya sang mga napatay sa operasyon.
