KORONADAL CITY – Nagapadayon sa subong ang imbestigasyon sang mga kapulisan sa nagluntad nga pagpangluthang sa Barangay Langkong, Matanog, Maguindanao kun sa diin duha ang napatay kag 3 naman ang pilason.
Ginkilala ni Maguindanao police spokesperson Capt. Fhaeyd Cana ang mga napatay nga biktima nga sanday Bro Lumbos kag ang hinablos sini nga si Raprap Esmael, 3 ka tuig samtang pilason naman ang mga biktima nga sanday Akmad Makaurao, 38 anyos sang Barangay Lalabuan, Balabagan, Lanao del Sur kag duha pa nga mga kabataan nga nagaedad 3 tubtub 5 ka tuig.
Sandig sa imbestigasyon sang mga otoridad, ginpangluthang sang mga wala pa nakilala nga mga suspek usar ang ginapatihan nga M-16 ang mga biktima nga nagahakwat sang sako sang mais sa multicab para ibaligya kuntani samtang nagahampang naman ang mga biktima nga menor de edad.
Naka-angkon sang igo sang bala sa nagkalain-lain nga bahin sang lawas ang mga biktima nga nangin kabangdanan sang kamatayon sang duha ka biktima, samtang gindangat naman sa pinakamalapit nga balay-bulungan ang mga pilason nga biktima.
Madasig naman nga nagpalagyo ang mga suspek sa krimen kag ginalantaw naman ang posibilidad nga rido ukon away pamilya ang rason sang nagluntad nga krimen.
