Patay ang tatlo ka indibidwal samtang anom naman ang pilason sa nagluntad nga salpukanay kahapon, Abril 4, 2025, banda 5:45 sang hapon sa National Highway sang Brgy. Impao, Isulan, Sultan Kudarat.
Ini ang ginkumpirmar ni PLT COL. Julius Malcontento, COP sang Isualn PNP sa interbyu sang Bombo Radyo Koronadal.
Suno sa opisyal, may sakay ang sedan sang 8 katao, 3 ang menor de edad kag suno magparyentehanay. Samtang ang sakay sang pick up amo ang drayber sini.
Suno sa datos sang kapulisan, lakip sa mga napatay amo sanday alyas ‘Charlie’ 40-anyos, kag isa ka menor de edad nga babae nga ginkilala nga si alyas ‘angel’ ,8-anyos nga amo ang sakay sang isa ka MG Sedan, samtang ginbawian naman sang kabuhi si alyas ‘Connie’, samtang gina bulong sa balay-bulolngan.
Nakaagom naman sang pilas ang driver sang Sedan nga ni Nelson Mijares Malacapay, 46-anyos, may asawa kag ang pipila pa sini ka pasahero nga sanday Merlyn Flores, 63-anyos,Shamona Flores, 17; Jesil F. Lopez, 36; Jonela F. Lopez, 7; nga lunsay mga residente sang Purok Samadinalagon, Brgy. Daladap, Esperanza, Sultan Kudarat.
Pilason man ang driver sang pick-up van nga si Joven Ampo Catubo, 29-anyos, may asawa kag residente sang Purok 9, Brgy. Poblacion, Tacurong City.
Ginkumpirma man ni Malcontento nga ‘driver’s error’ ang nangin tunaan sang aksidente kag gina tudlo nga dako ang kakulangan sa parte sang drayber,.
Sa subong, padayon ang pagpaalinton sang mga otoridad sa tanan nga motorista nga mangin mahinalungon sa tanan nga oaras.
