KORONADAL CITY –Naglab-ot na sa duha katawo ang ginbawian sang kabuhi samtang apat naman ang pilason sa nagapadayon nga away sa tunga sang duha ka Moro clan sa Midsayap, North Cotabato.
Sa interbyu sang Bombo Radyo Koronadal kay Major Arvin Encinas, spokesperson sang 6th ID Philippine Army, madugay na nga away sa tunga sang duha ka Moro clans ang ginhalinan sang engkwentro nga nagresulta man sang pagbakwit sang halos 500 pamilya sa kahadlok nga malamita sila sa kinagamo.
Away sa duta ang ginhalinan sang inaway sa tunga sang pamilya Macarimbor kag Taha nga lunsay mga Maguindanaon sa Barangay Tumbras, Midsayap, North Cotabato.
Sa subong, nagpatunga na ang mga suldado kag kapulisan agud nga indi magdugay ang kambyuhanay sang lupok sa duha ka bahin.
Ginatinguhaan man sang mga opisyal sa lugar nga maresolbar ang wala paghangpanay sang duha ka pamilya.
