KORONADAL CITY – Duha ang ginbawian sang kabuhi samtang 26 naman ang pilason sa pagbaliskad sang isa ka elf truck sa bahin sang Trento, Agusan Del Sur kun diin pila sa mga sakay sini ang magkapamilya gikan sa banwa sang Surallah, South Cotabato.
Sa eksklusibo nga interbyu sang Bombo Radyo Koronadal kay Sharon Garcesa, bata sang isa sa mga napatay nga biktima, maligo kuntani sa dagat ang ila nga pamilya kag mga kaupdanan sa simbahan apang wala na nadayon bangud sa aksidente matapos nga makabunggo sa barikada sang gina-construct nga dalan ang ginasakyan sang mga ini.
Suno kay Sharon, nagdesisyon ang iya mga ginikanan, utod kag iban pa nga himata nga magpadulong sa banwa sang Trento agud magbakasyon kag Makita man ang iban nila nga mga paryente.
Gab-i suno pa natabo ang aksidente kun diin pagka-aga na napahibalo sa ila tagsa ka pamilya.
Nadala pa sa Bunawan District Hospital ang mga pilason apang wala magdugay napatay si Ginang Margie Garcesa nga residente sang Barangay Moloy, Surallah, South Cotabato kag isa ka onse anyos nga bata nga lalaki nga apo sang driver ng truck.
Sa subong yara na sa luwas nga kondisyon ang iban nga mga pilason samtang ginsaylo naman sa South Cotabato Provincial Hospital ang pila ka myembro sang pamilya Garcesa.
Nagapasalamat naman ang pamilya Garcesa sa tanan nga nagbulig sa ila agud nga makapauli sa banwa sang Surallah ang bangkay sang ila nga iloy nga napatay sa aksidente.
