Nagapadayon sa subong ang imbestigasyon sang mga otoridad sa natabo nga disgrasya sa dalanon nga nagresulta sa kamatayon sang 2 ka tawo kag pagkapilas sang halos 20 ka iban pa.
Ginkilala lang ang mga napatay nga biktima nga sanday Melanie, 18 anyos kag Hadji Abas, 70-anyos nga lunsay residente sang Dalican, Datu Odin Sinsuat, Maguindanao.
Suno naman sa report sang South Upi PNP, sakay ang 25 katawo sa isa ka truck kag padulong kuntani sa banwa sang Lebak, Sultan Kudarat apang sang nag-abot sa pakurbada nga bahin sang national higway sa South Upi, Maguindanao, nadulaan sang kontrol sa break ang driver.
Samtang suno naman sa isa ka sakay sang truck, ginlikawan suno pa sang driver nga mahulog ang ila nga salakyan sa pil-as rason nga ginbunggo na lamang nya ini sa concrete kag steel railings sa national highway sa Sitio Sinako, Barangay Kuya, sa nasambit nga banwa.
Gilayon naman nga nagresponder ang mga myembro sang South Upi PNP kun sa diin gilayon nga gindangat sa ospital sa Barangay Tinaman ang mga biktima.
Nahibaluan nga magadulong kuntani sa isa ka kasal sa bayan sang Lebak ang mga biktima.
