KORONADAL CITY – Nagapadayon ang imbestigasyon sang Bagumbayan PNP angot sa nagluntad nga aksidente sa dalanon nga ginkapatay sang duha kag ginkapilas sang duha nga iban pa sa banwa sang Bagumbayan, Sultan Kudarat.
Base sa inisyal nga imbestigasyon, sakay ang mga biktima sa forward Isuzu truck nga may karga nga palm oil nga ginamaneho ni Nazario Olivar Jr, 30 anyos kag residente sang Brgy. EJC Montilla, Tacurong City.
Suno sa kapulisan, pakadto kuntani sila sa siyudad sang Tacurong halin sa Brgy. Limuay sa banwa sang Senator Ninoy Aquino apang nadulaan suno pa sang brake pag-abot sa Sitio Little Baguio, Brgy. Chua sa Bagumbayan sa pa-kurbada nga dalan, rason nga naglumpat pagguwa ang apat sa mga sakay sini.
Dead on the spot sanday Roselo Judilla 31 anyos kag Gabriel Judilla, 35 anyos samtang pilason naman sanday Edwin Hiso, kag Jeric Dela Cruz, lunsay mga residente sang Brgy. EJC Montilla.
Samtang wala naman sang may naangkon nga pilas sa lawas ang driver nga si Olivar kag isa pa ka pasahero nga si Jeric Judilla.
Kasamtangan na nga yara sa kustodiya sang kapulisan si Olivar kasunod sang natabo.
