KORONADAL CITY- Nagsungka sa militar ang 2 ka mga child warriors nga komunista kag rebelde nga grupo nga New People’s Army sa Brgy. Midtungok sa banwa sang Senator Ninoy Aquino, Sultan Kudarat.
Nahibaluan nga ang mga nagsungka nga mga child warriors ang naga edad sang 13 kag 16 anyos nga ginasiling nga ginnrecruit sa Datu Wasay, Kalamansig kag ginhimo nga mga war medics sang NPA.
Suno sa 33rd Infantry Makabayan Battalion Philippine Army sa pagpamuno ni Lt. Col Harold Cabunoc, ginpromisahan man suno pa ang mga ini nga pagahatagan sang maayo nga bwas damlag sang komunista kag rebelde nga grupo apang ila narealisar nga wala sang kamatuuran ang promisa sang NPA kag sa baylo nabutang sa alanganin ang ila kabuhi kag luyag nalang suno pa nga magpauli sa ila nga pamilya.
Nahibaluan nga ang pag-usar sang child warriors ang nagabayolar sa layi sang Pilipinas bilang pag abuso sa kinamatarong sang mga ini kag nagalapas man sa Geneva Conventions ukon layi sa pakig gyera.
Ginpasiguro man nga magapanabat ang mga komunista kag rebelde nga yara sa likod sini.
