KORONADAL CITY – Yara na sa kustodiya sang mga otoridad ang duha ka ginakabig nga mga notoryos carnapper nga involbado man sa pagduso sang droga sa probinsiya sang Sultan Kudarat makaligad nga maaresto.
Ginkilala ang mga suspek nga sanday AbdulKadir Bro Tandual Alias Bulatukan Musa Tandual, 34, may asawa kag Borhan Talidtig Abubakar, 34 nga lunsay mga residente sang Barangay Pimbalayan, Lambayong, Sultan Kudarat.
Nadakpan ang mga ini makaligad nga ginpatigayon ang operasyon agud nga iserbe ang 5 ka search warrants batuk sa mga suspek sang gintingob nga pwersa sang SKKPSC Swat team, SKPPO, SKPIB, 14th Mechanized Company,PA, RID-12, PDEA kag Lambayong PNP.
Narekober sa puluy-an ni AbdulKadir ang 1 unit sang homemade Cal. 45 pistol, 2 magazine kag 15 ka live ammunitions kag 3 ka kinawat nga motorsiklo.
Samtang, nakuha man sa puluy-an ni Abubakar ang 13 sachect sang ginapatihan nga shabu kag isa man ka kawat nga motorsiklo nga nakarehistro sa pangalan nga Jhunrey A. Roble.
Sa subong, ginapreparar na ang nagakaigo nga kaso nga ipasaka batuk sa mga suspek.
Dako naman ang pagpati sang kapulisan nga isa ka organized group ang mga naarestar nga suspek nga nagapatigayon sang operasyon sa nagkalain-lain nga sa Mindanao.
