KORONADAL CITY – Liwat nga nagkaengkwentro ang duha ka magkaaway nga pamilya sa General Salipada SK Pendatun, Maguindanao.
Ini ang ginkumpirmar ni Lt. Col. Harold Cabunoc, commanding officer sang 33rd IB Philippine Army sa interbyu sang Bombo Radyo Koronadal.
Suno kay Cabunoc, liwat nga nag-inaway ang mga tinawo sang pamilya Matalam kag Cua nga may madugay na nga wala paghangpanay bangud sa duta nga ila ginauma.
Nagdugay sang halos isa ka adlaw ang kambyuhanay sang lupok sang duha ka bahin usar ang matag-as nga sahi sang armas luthang antes nga nakontrolar sang mga suldado ang lugar.
Bangud sa hitabo, wala nadayon ang kasal kuntani bangud sa wala ginpahanugutan ang mga residente nga magsulod sa nasambit nga lugar samtang nagapadayon ang engkwentro.
Maayo na lamang kag wala snag may nareport nga casualties sa duha ka bahin.
Madumduman nga sang nagligad nga semana, 6 ang nareport nga napatay kag 3 ang pilaon sa away sang duha ka pamilya nga naghingyo sang bulig sa ila tagsa ka mga himata nga katapu sang MNLF kag MILF.
Apang, gin-athag ni Cabunoc nga indi away sang MNLF kag MILF ang natabo kundi duha ka pamilya nga may rido.
Sa subong, nagtahaw na nag nilupkanay kag nagpatunga man ang mga opisyal sa nasambit nga lugar agud nga makaangkon sang negosasyon ang duha ka grupo.
