KORONADAL CITY- Nakapreso na sa karon sa Koronadal City lockup cell ang duha ka mga lalaki nga suspek sa pagpangawat sa isa ka punerarya sa syudad sang Koronadal.
Suno sa Koronadal City PNP, naaktuhan suno pa sang isa ka retirado nga pulis nga nagapangawat ang mga suspek sa tunga sang haya sang isa ka patay sa Southern Funeral Homes.
Sa panaysayon sang witness nga si John Garcia isa ka retired police, dyutay lamang ang mga naga pulaw sa haya sang magsulod ang suspek nga si Bienvenido De Pedro, 31 anyos kag nagpakuno kuno nga magahatag sang abuloy samtang nagabantay naman sa gwa nga bahin sang funeral parlor ang lookout sini nga si Richard Navarro, 34 anyos.
Nakit-an suno pa sang witness nga sa baylo magbutang sang kwarta, ginkuha ni De Pedro ang kwarta nga nagabalor sang P3,500.
Bangud sa panghitabo, ginpunggan sini ang suspek kag gilayon nga nagpanawag sang pulis agud ipadakop ang mga ini kun sa diin gilayon naman ang mga ini nga gin arestar sang Koronadal City PNP.
Ginbalibaran naman sang mga suspek ang akusasyon batuk sa iya.
Sa karon yara na sa kustodiya sang Koronadal City PNP ang mga suspek samtang nagapadayon ang imbestigasyon.
