KORONADAL CITY– Ginpasakaan sang kaso nga large scale estafa ang duha ka babaye nga scammer nga naarestar sang National of Bureau of Investigation 12 sa South Cotabato.
Sa ekslusibo nga interbyu sang Bombo Radyo Koronadal kay NBI 12 Director Olivo Ramos, ginkilala ang mga suspek nga sanday Sheryl Nemitra kag Maria Ruby Garcia nga anay na man nga may ginapangatubang nga kaso sang pagpanonto kag pagpangwarta sang miliyon nga balor sa ila mga biktima.
Nahibaluan nga ulihi nga nagsang-at sang reklamo ang isa ka negosyante halin sa siyudad sang Davao nga naganyat suno pa sang duha nga maka invest sang P3 million para sa isa ka government project sa probinsya sang Sultan Kudarat kun sa diin natukiban sang investor nga wala sang kamatuoran ang ginasiling nga mga proyekto sang mga suspek.
Dugang pa sini nga nagkalain lain man nga pamaagi ang gina usar sang mga suspek agud makapanonto kun sa diin indi lamang sila naga operar sa South Cotabato kag syudad sang Davao apang mangin man sa bug-os nga rehiyon 12.
Gin-awhag naman ni NBI 12 Director Ramos ang iban pa nga mga biktima sang mga suspek nga magdulhog sa ila talatapan agud pormal nga makasang-at sang kaso.
