KORONADAL CITY- Ginpaidalum na sa imbestigasyon ang driver sang isa ka pampasahero nga Jeep sa Datu Odin Sinsuat, Maguindanao makaligad nga matukiban sa sulod sang ginamaneho sini nga salakyan ang 2 ka mga Improvised Explosive Device.
Sa ekslusibo nga interbyu sang Bombo Radyo Koronadal kay 6th Infantry Division Philippine Army spokesperson Captain Arvin Encinas, nabalabagan sang militar ang jeep nga ginamaneho sang wala pa ginpangalanan nga driver kun sa diin narekober ang 2 ka mga eksplosibo sa sulod sang isa ka bag.
Tuman naman ang pagpanginwala sang driver nga may kaangtanan sya sa mga narekober nga mga eksplosibo kun sa diin suno sa iya halin suno pa sa Datu Piang ang bag kag ginpadala lang sang isa ka sibilyan kag ginasiling nga may magakuha lang sang bag pag-abot sa Cotabato City.
Nagapati naman ang kasuldaduhan nga Bangsamoro Islamic Freedom Fighters pa sa gihapon ang yara sa likod sang panibag-o nga insidente sang pagkarekober sang mga eksplosibo.
