KORONADAL CITY- Ginapangita sa gihapon ang duha ka mga menor de edad nga gin anod sang mabaskog nga tubig sa Sitio Salkan, Brgy. Paraiso, Koronadal City.
Sa ekslusibo nga interbyu sang Bombo Radyo Koronadal kay Brgy. kapitan Samuel Velarde, nasiplatan ang duha ka 4 ka tuig nga mga biktima nga sanday Rhojay Dave Sabang kag Raymond Awan nga lunsay mga magpakaisa nga nagahinampang sa may patay nga suba sa nasambit nga barangay.
Sa katungaan sang paghampang sang mga ini, nag ulan kag wala ginalauman nga nagtaas ang lebel sang tubig sa suba kag gin anod ang duha ka mga bata.
Gintilawan pa nga lagson sang isa pa ka menor de edad nga si alyas Yan-Yan ang duha ka mga bata apang mabaskog ang current sang tubig.
Sa subong ginapangita pa ang mga ini nga posible gin anod sa pihak nga banwa sa Tantangan, South Cotabato.
Nagtingob pwersa naman ang Koronadal City kag Tantangan rescue team, PDRRMO, Red Cross, BFP Koronadal kag Koronadal City PNP sa pagrecover sa mga biktima.
