Patay ang duha ka mga magagmay nga kabataan matapos nga malakip sa pagkasunog sang ila panimalay sa Purok 1, Apex Village, Brgy. Elizalde, Maco, Davao De Oro kahapon sang aga.
Suno sa mga otoridad pasado alas-9 sang aga sang natabo ang pagkasunog sang puluy-an sang mga biktima kun diin wala nakaguwa ang mga ini bangud madasig nga nagdako ang kalayo.
Suno pa sa mga kaingod sang biktima, ang duha ka bata ang naga-edad lamang sang 3-anyos kag isa ka tuig nga nasunog man dala sang pagkaabo sang ila panimalay.
Maswerte nga nahingagaw nga maluwas sang iya mga kaingod ang isa pa ka utod sang mga biktima.
Naguwa sa imbestigasyon nga isa ka kandila nga nabayaan ang ginhalinan sang kalayo tubtob nga nagdako ini kag naubos ang ila puluy-an nga hinimo sa light materials.
Nahibaluan nga wala sa ila puluy-an ang ginikanan sang mga biktima sang natabo ang sunog.
Ang ila amay ang yara sa trabaho samtang ang iloy sang mga ini ang yara sa Metro Manila bangud naga-apply nga mag-abroad.
