KORONADAL CITY- Nadugangan pa ang mga banwa sa probinsiya sang South Cotabato nga ginpaidalom sa state of calamity bangod sa malala nga epekto sang El Niño phenomenon.
Ini matapos nga ginkumpirmar sa Bombo Radyo Koronadal ni Mark Tangcala, Officer 3 sang Municipal Disaster Risk Reduction and Management Council sang T’boli nga ginpaidalom naman sa state of calamity ang ila nga banwa.
Suno kay Tangcala,gin aprubahan sang Sangguniang Bayan pinaagi sa ordinance no. 12 series of 2019 ang rekomendasyon sang Municipal Disaster Risk Reduction and Management Council bangod sa dako nga epekto sang tag-init sa mga pananom.
Sa nasambit nga ordinansa ginhatagan sang authority ang local chief executive nga magamit ang 30 porsiyento sang quick response fund nga may balor nga masubra sa P5.3 million para sa relief and recovery program.
Sa ginpagwa nga assessment ni Municipal Agriculture Officer Barry Lugan naglab-ot na sa masubra P47 million ang damyos sa mais halin sa masubra 2 libo nga ektarya samtang masubra sa 2 libo man nga mga mangunguma ang apektado halin sa 24 ka mga barangay.
Aminado man si Tangcala nga madugangan pa ang damyos nga dala sang kalamidad.
Sa subong yara na sa proseso suno pa sa pagpreparar sa paghatag sang bulig ang MDRRMO Tboli kun sa diin dako nga porsiyento halin sa quick response fund ang magapadulong sarice distribution sang LGU sa mga apektado kag corn seed naman kun mangin istable na ang sitwasyon.
Kun madumduman nga una na nga nagdeklarar sang state of calamity ang banwa sang Surallah, South Cotabato.
