Nadala lamang sa mga mali nga mga impormasyon ang rason kung ngaa nagpasakop ang isa ka anay New People’s Army (NPA) nga mangin isa ka rebelde.
Sa interbyu sang Bombo Radyo Koronadal kay Alyas Charlyn, isa ka anay New People’s Army (NPA) nga nagbalik sa sabak sang gobyerno, ginsaysay sini nga siya ang narecruit sang CPP-NPA bangud sa promisa nga sila ang mahatagan sang manami nga pangabuhi nga kung sa diin indi mahatag sang gobyerno.
Apang sa pihak sang mga promisa, baliktad ini sa iya naeksperyensyahan, bangud tuman nga kabudlay kag mga engkwentro ang ila nga naeksperyensyahan.
Suno pa sa iya, tuig 2018 sang siya ang nagdesisyon nga magsulod sa grupo — isa suno siya ka medic kag isa man ka recruiter. Sa karon, napagdesisyunan niya nga magbalik sa sabak sang gobyerno bangud gusto niya na sang malinong nga pagpangabuhi kag makaupod ang iya nga pamilya.
Gindugang pa sini nga luyag niya man nga mangin isa ka sundalo amo nga tuman ang ila nga pagpasalamat nga kaupod nila sa karon ang 37th infantry batallion para naman sa pagbulig sa ila.
