KORONADAL CITY– Nagtuga sang kahadlok sa mga residente sang Lambayong, Sultan Kudarat ang mga narekober nga mga Improvised Explosive Device sa isa ka simbahan.
Sa interbyu sang Bombo Radyo Koronadal kay Police Capt. Herman Luna, hepe sang Lambayong PNP, madasig nga nagresponder ang Explosive Ordinance Division Team sang Sultan Kudarat PNP, 22nd Mechanized Company Phil. Army kag Lambayong PNP sa isa ka impormasyon sa nasapwan nga mga IED sa atubang sang simbahan nga katoliko sa bahin sang Purok Rosal Barangay, Pimbalayan sa nasambit nga lugar.
Suno naman sa isa ka residente nga si Sammy Bibat, nasapwan sang iya nga bata ang nasambit nga IED sa entrance mismo sang simbahan kag yara sa 2 metro lang ang kalayuon sa kilid sang barangay road sang nasambit nga lugar.
Diri kag nakit-an ang isa ka butang nga may tatlo ka electrical cord, gilayon naman nga nagpangayo sang bulig ang mga ini sa pinakamalapit nga detachment sang CAFGU kag militar.
Sa karon, ginahibalo pa kun ano ang motibo kag kun sino ang responsable sa pagbutang sang nasambit nga mga IED sa guwa sang simbahan.
