KORONADAL CITY– Naglab-ot sa 6 ka kilo nga marijuana kag masobra P100,000 nga balor sang shabu ang narekober sang Philippine Drug Enforcement Agency 12 sa duha ka asud-asod nga operasyon sa probinsya sang South Cotabato kag Sultan Kudarat.
Nahibaluan nga una nga ginpatigayon ang operasyon sa Prk. 5 Brgy. Maltana, Tampakan South Cotabato sang gintingob nga pwersa sang Tampakan PNP kag PDEA 12 batuk sa suspek nga si Charwin LopLop Del Mundo alyas Toto, 30 anyos wala sang trabaho akag residente sang nasambit nga lugar kun sa diin nakumpiskar sa iya posisyon ang 9 ka pakete sang shabu nga may kabug-aton nga 20 grams kag may balor nga masobra P100,000, narekober man ang mga drug paraphernalia kun sa diin ang suspek ang yara sa likod sang illegal drugs proliferation sa Tampakan kag sa mga kalapit nga banwa.
Ginsundan naman ini sang anti-narcotic operation sa Diego Silang st. Brgy. Poblacion sa syudad sang Tacurong sa probinsya sang Sultan Kudarat kun sa diin nagresulta ini sa pag-arestar kay Vic Abuton Cabaging alyas Ping-Ping, 40 anyos, mangunguma kag residente sang nasambit nga lugar nga yara sa targetlist man sang PDEA 12.
Nakuha man sa posisyon ni Cabaging ang masobra 6 ka kilo nga marijuana kag marijuana seed nga ginabulubanta nga yara sa P50,000 ang balor.
Sa karun ang mga natikma nga mga suspek ang ginpasakaan na sang kaso nga paglapas sa section 5 (Sale of Dangerous Drugs) kag section 11 (Possession of Illegal Drugs sang RA 9165 o Comprehensive Dangerous Drugs Act of 2002.
