Nagapabilin nga kritikal ang kahimtangan sang duha ka estudyante nga kabilang sa 15 ka mga kabataan nga nasamaran sa naganap nga pagpamusil sa sulod sang San Jose National High School sang Lunes.
Ginkilala ang duha ka biktima nga sanday Joan Vinias, isa ka Grade 10 student nga nagtamo sang igo sang bala sa ulo, kag Nathan Candelario, isa ka Grade 9 student nga nasamaran sa tiyan matapos mabunalan sang bala.
Suno kay Rowena Eracho, iloy ni Joan, nagreklamo sang malain nga pamatyag ang iya anak sang aga antes naglakat pakadto sa eskwelahan kag halos wala na kuntani makapasok. Apang nagpursige ini nga magsulod sa klase gani ginpahanugutan niya. Apang pagkaligad sang pila ka oras, nabatian na lamang niya ang balita tuhoy sa pagpamusil sa eskwelahan.
Sa iya pag-abot sa ospital, nakita niya ang iya anak nga nagahigda sa stretcher kag nagapakig-away para sa kabuhi. Bangud sini, indi matago sang ginikanan ang ila kasubo kag pagpamangkot kon paano nakasulod sa eskwelahan ang mga menor-de-edad nga may dala nga armas.
Nagapangamuyo si Rowena para sa madali nga pag-ayo sang iya anak nga may handum nga mangin nurse sa palaabuton.
Nagapabilin man nga kritikal si Nathan Candelario. Suno sa iya amay nga si Erwin, nagsulod ang bala sa idalom sang pusod sang iya anak kag nagguwa sa kilid sang lawas. Gindugang niya nga tatlo ka buho ang nahimo sang bala sa bituka sang binatilyo, gani ginapaabot nga malawig ang iya pagpanambal kag pagpakamaayo.
Sa kabug-usan, 15 ka estudyante ang nasamaran samtang tatlo naman ang napatay sa maduguon nga insidente nga nagkurog sa komunidad kag sa sektor sang edukasyon.
Base sa imbestigasyon sang kapulisan, duha ka menor-de-edad nga nagaedad 14 kag 15 anyos ang ginatudlo nga responsable sa pagpamusil kag yara na subong sa kustodiya sang mga awtoridad.
Ang 15-anyos nga suspetsado nagaatubang sang mga reklamo nga murder kag frustrated murder matapos matukiban sang mga imbestigador nga may yara ini sang paghangop sa kabug-usan sang iya ginhimo.
Samtang nagapadayon ang kaso, padayon man ang panawagan sang mga pamilya sang mga biktima para sa hustisya kag sa pagpanabat sang tanan nga may kaangtanan sa isa sa pinakamaduguon nga insidente nga nagluntad sa isa ka eskwelahan sa bag-o nga panahon.
