KORONADAL CITY – Duha ka myembro sang Bangsamoro Islamic Freedom Fighters (BIFF) ang napatay samtang 3 naman ang pilason sa panibag-o nga engkwentro sa tunga sang mga local terrorist kag mga suldado sa probinsiya sang Maguindanao.
Suno kay Lt. Col. John Paul Baldomar, tigpamaba sang 6th ID Philippine Army, nagluntad ang panibag-o nga engkwentro sa Barangay Mao, Datu Paglas, Maguindanao.
Ginkilala ang mga napatay nga sanday Mansur Amil kag Salem Oting , lunsay mga myembro sang Kagui Karialan, isa sa mga leader sang BIFF nga nagapangatubang sang masobra 30 ka kaso sang nagkalain-lain nga lugar kag responsable sa pagpamomba sa Central Mindanao.
Magluwas sa mga napatay may 3 pa ka mga BIFF members naman ang napilasan.
Sa subong nagalab-ot na sa halos 10 ang mga BIFF nga napatay sa nagapadayon nga operasyon sang military batuk sa mga terorista nga grupo sa Mindanao.
Samtang, may mga bakwit naman nga nagapabilin sa mga evacuation center bangud sa nagapadayon nga engkwentro.
