KORONADAL CITY – Yara na sa Collado Funeral Homes sa banwa sang Surallah, South Cotabato ang bangkay sang duha ka bata nga babaye nga nalunod matapos gin-anod sang tubig-baha sa isa ka suba sa Barangay Lamlahak, Lake Sebu, South Cotabato.
Ini ang ginkumpirmar ni Mayor Antonio Fungan sa interbyu sang Bombo Radyo Koronadal.
Ginkilala ang mga biktima nga sanday Jillian Adel Isay, 7-anyos kag Jesabelle Segundo, 9-anyos mga estudyante sang Barangay Lamlahak Elementary School.
Suno kay Mayor Fungan, una nga narekober ang bangkay sang 9-anyos nga bata duha ka kilometro ang kalayuon gikan sa lugar kun diin gin-anod ang mga biktima sang mabaskog nga tubig.
Samtang ang kaupod naman sini nga 7-anyos ang narekober pasado alas-6 sang aga sa Quarry site sa may Luil River.
Suno kay Fungan, temprano nga ginpapauli sang ila nga mga manunudlo ang mga estudyante sang Lamlahak Elementary School sa Sitio Lamluti sa nasambit nga banwa bangud sa mabaskog nga ulan.
Nag-agi sa subaw papuli na sa ila nga puluy-an ang mga bata kun diin nag untat ang mga ini agud nga magpangihi apang bangud sa mabaskog nga current sang tubig naanod ang mga ini.
Dugang pa sang alkalde nga duha ka adlaw nga magkasunod nga wala untat ang pagbubo sang ulan sa ila nga banwa.
Matapos mareport ang pagkalunod sang duha ka bata gilayon nga nagpatigayon sang search kag retrieval operation ang Municipal Disaster Risk Reduction and Management Council (MDRRMC) apang wala masagop ang kabuhi sang mga ini.
