KORONADAL CITY – Nadugangan pa ang mga banwa sa probinsiya sang South Cotabato nga ginpaidalom sa state of calamity bangud sa tuman nga epekto sang El Niño phenomenon.
Ini makaligad nga ginkumpirmar sa Bombo Radyo Koronadal ni Mark Tangcala, Officer 3 sang Municipal Disaster Risk Reduction and Management Council sang T’boli nga ginpaidalom naman sa state of calamity ang ila nga banwa.
Suno kay Tangcala, gin-aprubahan sang Sangguniang Bayan paagi sa ordinance no. 12 series of 2019 ang rekomendasyon sang Municipal Disaster Risk Reduction and Management Council bangud sa dako nga epekto sang tag-ilinit sa mga pananom.
Sa nasambit nga ordinansa ginahatagan sang authority ang local chief executive nga magamit ang 30 porsiyento sang quick response fund nga nagakantidad sang masobra P5.3 million para sa relief and recovery program.
Sa ginpaguwa nga assessment ni Municipal Agriculture Officer Barry Lugan naglab-ot na sa masobra P47 million ang damyos sa mais gikan sa masobra 2 libo nga ektarya samtang yara naman sa masobra 2 ka libo man nga mga mangunguma ang apektado gikan sa 24 ka mga barangay.
Aminado man si Tangcala nga madugangan pa ang damyos nga tuga sang kalamidad.
Sa subong, yara na sa proseso sang paghatag sang bulig ang MDRRMO Tboli kun diin dako nga porsiyento gikan sa quick response fund ang magapadulong sa rice distribution sang LGU sa mga apektado kag corn seeds naman sa tion nga mangin istable na ang sitwasyon.
Kun madumduman, una na nga nagdeklarar sang state of calamity ang banwa sang Surallah, South Cotabato.
