KORONADAL CITY – Duha ka banwa na sa probinsya sang South Cotabato ang ginpaidalom sa state of calamity bangud sa malapnagon nga pagbaha kag landslide tuga sang pagbubo sang mabaskog nga ulan.
Suno kay South Cotabato Provincial Disaster Risk Reduction and Management Officer Mila Lorca, ginpaidalom na sa state of calamity ang banwa sang Tampakan base sa Resolution No. 370 kun diin apektado ang lima ka mga barangay nga ginalakipan sang Palo 19, Kipalbig, Pula Bato, Tablu kag Liberty.
Una diri, nagdeklarar na sang state of calamity ang banwa sang Tupi bangud man sa nasambit nga kalamidad.
Sa subong, nagapadayon ang ginahimo nga validation sang Provincial Government sang South Cotabato angot sa kabug-usan nga damyos sang baha kag landslide sa nasambit nga mga banwa.
Suno sa iya, kinahanglan nga mavalidate ang data sang kabug-usan nga damyos sang kalamidad agud nga mahibaluan kun ano ang mahimo nga bulig nga mahatag sa mga apektado nga residente sa nasambit nga mga banwa.
