KORONADAL CITY– Nangin apektado sang malapnagon nga baha ang duha ka banwa sa probinsiya sang North Cotabato bangud sa pila ka adlaw nga asod-asod nga pagbubo sang mabaskog nga ulan.
Ini ang ginkumpirmar ni Engr. Arnulfo Villaruz, chief for operations sang PDRRMO-North Cotabato sa interbyu sang Bombo Radyo Koronadal.
Suno kay Villaruz, kalakip sa mga ginbahaan ang relocation site sang mga pamilya nga naguba ang puluy-an bangud sa mabaskog nga pagtay-og sang
linog sang 2019 sa Barangay Ilomavis, Kidapawan City.
Samtang, ang mga pamilya nga nagapuyo sa kilid sang Liguasan Marsh sa mga barangay sa Pikit, North Cotabato ang ginbahaan man bangud sa pag-awas sang tubig-baha sa suba.
Wala man nakaluwas sa baha ang mga mosque kag sementeryo sa nasambit nga banwa.
Kaangot sini, gilayon naman nga nagpatigayon sang assessment and PDRRMO-North Cotabato sa mga apektado nga lugar kun diin nagpanghatag man sila sang mga relief goods bilang pauna nga bulig sa mga apektado nga pamilya.
