Nasapwan na nga wala sang kabuhi ang duha ka lalaki sa isa ka liblib nga bahin sang Barangay Midtimbang, Datu Anggal Midtimbang, Maguindanao.
Ini ang ginkumpirma ni PCPT Guisepe Tamayo, Spokesperson Maguindanao del Sur Police Provincial Office sa interbyu sang Bombo Radyo Koronadal.
Ginkilala ni Tamayo, ang mga biktima amo manugbaligya sang isda nga sanday alyas Alvin , 48 anyos, kag alyas Rey, 40 anyos, kasado, kag lunsay mga residente sang Barangay Panay, Sto. Niño, South Cotabato.
Suno kay Tamayo, mismo ang asawa sang biktima ang nagkumpirma sang iya nga bana nga suno pa lunes sang gab-i ang ulihi nga pagpakig-angot ni Marilou sa iya bana antes ini nabalitaan nga nakit-an na lang ini nga patay upod kay Alvin, may mga igo sang bala sa likod kag atubang nga bahin sang ila lawas.
Ginkumpirmar man ni Tamayo nga wala sang direkta nga palatandaan sang pagpangluthang ukon torture base sa inisyal nga report.
Sa subong, yara na sa pamilya ang mga bangkay kag padayon naman ang imbestigasyon sang kapulisan sa kaso.
Dugang pa ni Tamayo, Isa sa mga kabudlayan sang imbestigasyon amo nga wala sang CCTV footage sa nasapwan nga lugar kag ang pinakalapit nga balay sa amo nga barangay yara pa sa distansya nga masobra isa ka kilometro.
Nagapanawagan subong ang pamilya sang duha ka biktima sang hustisya kag maghatag sang impormasyon sa kapulisan agud makabulig nga mapadasig ang imbestigasyon sa nasambit nga krimen.
