KORONADAL CITY- Padayon pa nga ginalagas sang Sultan Kudarat PNP ang isa ka barangay kapitan nga nakalagyo sa ginatigayon nga anti-illegal drugs operation sang gin-isa nga pwersa sang militar kag Sultan Kudarat PNP sa banwa sang Poblacion, Lambayong Sultan Kudarat.
Sa ekslusibo nga interbyu sang Bombo Radyo Koronadal kay Sultan Kudarat Police Provincial Director Senior Superintendent Raul Supiter, target sang 4 ka search warrant ang isa ka kapitan nga ginkilala lang kay kapitan Biang sang Brgy. Bulod, Sultan sa Barongis, Maguindanao.
Nahibaluan nga sa nasambit nga operasyon, wala naabtan sa puluy-an sini ang kapitan apang naarestar naman ang bata sini nga si John Paul Biang kag isa pa ka suspek nga ginkilala kay Jack Mupac.
Nakuha naman sa posisyon sang mga suspek ang nagkalain lain nga matag-as nga sahi sang armas, 2 ka dako nga pakete sang ginapatihan nga shabu kag mga drug paraphernalias.
Sa subong yara na sa kustodiya sang Sultan Kudarat PNP ang mga suspek kag nagapangatubang sang patong-patong nga mga kaso.
