KORONADAL CITY- Tigayon na nga ginkanselar sang Local Government sang Tacurong City, Sultan Kudarat ang ila 2 ka mga aktibidad para sa nagahilapit nga Talakudong Festival nga magasugod sa Setyembre 10-18, 2018.
Ini makaligad ginkumpimar sa Bombo Radyo Koronadal ni 6th Infantry Division commander Brigadier General Cirilito Sobejana nga target man nga pasigabungan sang mga terorista ang Tacurong City lakip na ang banwa sang Esperanza, Sultan Kudarat makaligad ang asud-asod nga pagpasigabong sa banwa sang Isulan.
Ang mga ginkansela nga aktibidad sa Talakudong festival amuh ang Ultra Marathon kag ang Street Dancing kun sa diin masami madamo sang nagatambongg kag ginhilisugtan naman nga ipatigayon nalang ang tanan nga mga aktibidad sa city hall ground.
Samtang sa pihak nga bahin, suno kay PSupt. Joefel Siason, hepe sang Tacurong City PNP, sa karun gintingob nga mga myembro sang PNP kag militar na ang nagapatigayon sang 24 nga checkpoint pagwa kag pasulod sa ila nga syudad kag mas ginpahugtan man ang ila intelligence monitoring.
