KORONADAL CITY– Mas ginpahugtan na sa subong ang seguridad sa bug-os nga Central Mindanao kasunod sang mga napagkit nga serye sang pagpasigabong nga nagbilin sang madamo nga pilason.
Sa esklusibo nga interbyu sang Bombo Radyo Koronadal kay Major Homer Estolas, tagpamaba sang 6th Infantry Division Philippine Army, ginpahayag sini nga doble na subong ang ginapatuman nga security measures sa mga matawo nga lugar sa Cotabato City kun sa diin nagluntad nga pagsigabong nga ginsundan sa banwa sang Limbungan, North Cotabato kag mangin man sa banwa sang South Upi, Maguindanao.
Suno kay Major Estolas, mas ginpahugtan man ang pagpatigayon sang checkpoints sa entry kag exit points agud nga malikawan ang kasubong nga insidente.
Samtang, ginbuyagyag man sini nga ang mga kabataan nga nagapang-edaron sang 15-anyos ang ginapatihan nga nagbilin sang mga eskplosibo sa Cotabato City.
Kaangot sini, ginahibalo na sang AFP kun ano nga grupo konektado ang nasambit nga mga kabataan kag padayon na nila ini nga ginaberipika.
Una sini, ginpahayag ni WESTMINCOM Spokesperson Major Arvin Encinas nga ang grupo sang Bangsamoro Islamic Freedom Fighters ukon BIFF ang may kahimuan sang pagpamomba.
Sa subong, nagapadayon sa gihapon ang imbestigasyon sang PNP kag AFP sa nasambit nga insidente kag ginahibalo kun konektado kag isa lang ka grupo ang may kahimuon sa 3 ka pagpang-atake.
