KORONADAL CITY- Nagbalik sa sabak sang gobyerno ang 13 ka mga miyembro sang Bangsamoro Islamic Freedom Fighters (BIFF) sa mga otoridad nga kung sa diin ginapatihan nga ang lima sa mga ini ang eksperto sa paghimo sang mga bomba o kun mga IED.
Ini ang ginpahayag ni Capt. Roderick Escolano, CMO Officer sang 1st Brigade Combat sa interbyu sang Bombo Radyo Koronadal.
Suno sa iya, ang 13 ka mga BIIF ang halin pa sa Midsayap, Datu Salibo , Datu Unsay kag Mamasapano sang Maguindanao nga kung sa diin nagsungka ang mga ini sa ma opisyal sang ng Army’s 1st Brigade Combat Team kag 6th Infantry Division.
Luwas sa ila nga mga kaugalingon, dala man sang mga terorista ang ila nagkalain lain nga mga armas, grenade launcher kag isa ka 60 millimeter mortar.
Gilayon naman nga naghatag sang una nga bulig ang gobyerno sa bulig sang pipila ka mga ahensya para sa mga nagsungka.
Luwas sini, ginpasiguro man sang opisyal nga mahatagan sang nagakaigo nga livelihood program ang mga surrenderees.
Sa karon, yara na sa 400 ka mga miyembro sang BIFF kag Dawlah Islamiya ang nagbalik sa sabak sang gobyerno humalin pa sang tuig 2017.
