KORONADAL CITY – Ginpasiguro ni 6th Infantry Division Philippine Army Spokesperson Captain Arvin Encinas nga indi sila magauntat sa paglagas sa grupo sang ISIS-inspired group nga BIFF.
Nakaengkwentro suno pa sang 48th Infantry Battalion Philippine Army ang Karialan Faction sa bahin sang Mamasapano, Maguindanao kun sa diin isa ka bangkay sang ginapatihan nga BIFF member ang ila narekober kag naglab-ot sa 16 nga high-powered firearms ang ila nakumpiska.
Sa interbyu sang Bombo Radyo Koronadal kay Captain Encinas, humalin sang ginbombahan kag narekober ang pabrika sang armas kag mga ginakutaan sang teroristang grupo, wala na gin-untatan sang BIFF ang ila mga plano nga magpalapnag sang kalakasan sa lugar.
Base sa pinakaulihi nga impormasyon, sa nagluntad nga operasyon, yara sa 13 suno pa ang napagkit nga patay sa bahin sang BIFF apang padayon pa nila ini nga ginaberipika, samtang duha ang killed in action kag 15 ang pilason sa bahin sang mga suldado.
Sa subong padayon pa ang clearing operation sang militar kasunod sang nagluntad nga engkwentro.
